Меҳнат Кодексининг 333- моддаси Air Samarkand'га нисбатан ҳам ишлатиладими? 50 га яқин ходими — Россия фуқаролари июнь ойидан бери маошлари, озиқ-овқатлари ва ижара пуллари тўланмаётгани ҳақидаги хабарларга муносабат билдирган Air Samarkand авиакомпаняиси ходимларининг маоши кечикаётганини тан олган. Бу иқрорнома шуниси билан муҳимки, иш берувчи Air Samarkand нафақат кечиккан маошларни тўлаши, балки Меҳнати кодексининг 333- моддаси бўйича кечиккан ойликларга нисбатан камида 1,7 каррагача миқдорда (июндан ҳисобланса) компенсация ҳам тўлаши керак. Лекин Меҳнат кодексининг 333- моддаси бўйича талаблар ижросида кўп бора ёзганимиздек, икки хил стандартлар мавжуд. Ўзбекистондаги йирик пудратлар ва давлат буюртмалари билан боғлиқ лойиҳаларда маошларнинг ойлар кечикишига панжа орасидан қараб келинади. Хусусан, Sanoat Energetika Guruhi Enera, Enter Engineering ёки Eriell каби компаниялар маошларни ойлаб кечиктиргани учун компенсациялар тўлагани ёки масалан Бандлик вазирлиги ёки унинг инспекцияси аралашиб компенсация ундириб бергани ҳақида хушхабар ўқиганимиз йўқ. Балки шунинг учун қонунсизликдан безган жабрдийдалар турли хорижий овозларга чиқишга мажбур бўлишар. Air Samarkand ҳам номлари келтирилган шонли компанияларга аффилланган. Балки бу сафар Бандлик вазирлиги Меҳнат Кодексининг 333- моддасини ишлатиб, Air Samarkand ходимларига компенсация ундириб берар? Ёки яна истисно қилинадими? Қонун фақат йўқсил ва ўртаҳолларга эмас, корчалонларга ҳам ишласин. Ахир ҳуқуқда ҳамма тенг ва Республика деб эълон қилинган давлатда яшаяпмиз, касталанган ва табақаланган давлатда эмас.