Меҳнат инспекцияси томонидан “Air Samarqand” иши бўйича жами 1,5 млрд. сўмлик даъво аризалари киритилган Бандлик вазирлигига кўра, “Air Samarqand” авиакомпанияси ходимларининг иш ҳақларини тўламаётганлик ҳолати бўйича ўнга яқин фуқародан ариза келиб тушган. Уларнинг июнь-август ойларида тўланмаган уч ойлик иш ҳақларини ундириш юзасидан Давлат меҳнат инспекцияси томонидан жами 1,5 млрд. сўмлик даъво аризалари киритилган. Даъво талабида қонунчиликка асосан кечиктирилган ҳар бир кун учун пулли компенсацияни қўшиб ҳисоблаган ҳолда ундириб беришни сўраб, фуқаролик ишлари бўйича Самарқанд шаҳар судига мурожаат қилинган. Эҳтимолки, авиакомпаниянинг маоши кечиктирилган бошқа ишчи ва ходимлари меҳнат инспекциясига мурожаат қилмаган. Улар ариза ёзса, мурожаатига асосан даъво аризаси киритилади. Вазирлик матбуот хизмати бу бўйича 1176 ёки (71)-200-06-00 ишонч рақамлари ёки @munosibmehnat_bot орқали шикоят қолдиришлари мумкинлиги эслатган.