Меҳнат кодексининг 333- моддасига ўзгартириш киритилади Камбағаллик вазирлигига кўра, тадқиқотлар ва жамоатчилик фикрини инобатга олган ҳолда, иш берувчи ва ходим ўртасидаги меҳнат муносабатларини янада тартибга солишга қаратилган таклифлар ишлаб чиқилмоқда. Суҳбатдан англашилича, Меҳнат кодексининг 333- моддаси бўйича иш ҳақи кечикканда иш берувчига қўлланилаётган нопропорционал жазо чораларини ўзгартириш бўйича қонун лойиҳаси ишлаб чиқилган ва ҳукуматга киритилган. Таъкидлаш керакки, ҳеч ким иш берувчилар меҳнаткашларнинг ҳақини бузаверсин, исталганча иш ҳақини кечиктирсин, деган важ ёки хоҳиш кўрсатаётгани йўқ. Асосий муаммо, биринчидан, жазо белгилашда иккиюзламачиликнинг мавжудлиги, хусусан бизнесга энергетик узилишларда етаётган зиён учун мутаносиб жавобгарликнинг мавжуд эмаслигида (бу жавобгарликни қонун билан белгилаш ҳақида ҳар йили масала кўтарилади, лекин ҳеч қандай реакция кўрсатилмайди). Иккинчидан, иш берувчига нисбатан жазо чораларининг тиювчи эмас, синдирувчи эканлигида, шимолдагилардан кўр-кўрона андоза олиб кўчирган ҳолда, компенсациянинг юқори даражаси белгиланмаганида. Учинчидан, Меҳнат кодексининг 333- моддаси бўйича талаблар ижросида икки хил стандартлар (дўстларга ҳамма нарса, душманларга қонун қабилида) мавжуд. Айтайлик, ўқитувчиларнинг ойлик маоши кечиккани ҳолатлари учун компенсация ундириб берилганини ҳали бирон марта эшитмадик. Ёки бўлмасам, пудрат қироллари ва ўзаро аффилланган олигархик гуруҳларнинг ойлаб маош бермасликлари ҳолатларига нисбатан Камбағаллик вазирлигининг ҳам, унинг инспекциясининг ҳам ноллашган муносабати мавжуд. Яъни қонун ойболтаси асосан ҳимояти йўқ кичик ва ўрта бизнес калласини олишга қаратилган, муаммо бюджет ташкилотлари ёки чўнтак олигархияга келганида, жим туриш танланади.