Хитойдан маҳаллий Malibu'лар эҳтиёт қисм, BYD электромобиллари кузов ва аккумулятор бўлиб кирмоқдами? Миркомил Холбоев маҳаллий ишлаб чиқарувчиларни қўллаб-қувватлаш дея ном олган, аслида чайқовчи монополистлар манфаатлари учун нотариф чекловлардан иборат охирги протекционизм тўлқинининг оқибатларини битта картинада намоён этмоқда. "Энг катта ўзгариш бу автомобиллар импортининг қисқариб, автомобиль эҳтиёт қисмлари импортининг ўсгани бўлган. Хусусан, жорий йилнинг 4 ойида енгил автомобиллар импорти ўтган йилнинг мос даврига нисбатан 364 млн долларга қисқарган. Автомобиль эҳтиёт қисмлари импорти эса 102,4 млн долларга ошган. Шунингдек автомобиль кузовлари импорти 49,6 млн долларга ошган". Бундан ташқари, электр аккумуляторлар импорти ҳам 33,5 млн.долларга ошганини кўришингиз мумкин. Аввалроқ, айни шу даврда Ўзбекистонга автомобиллардан (213,7 млн.доллар) кўра эҳтиёт қисмлар, яъни "запчастлар" (544,4 млн.доллар) каррасига кўпроқ импорт қилинаётгани ҳақида ёзган эдик. Истеъмолчиларни танловсиз қолдириш ҳисобига икки-уч чўнтакни бойитишдан иборат иккиюзламачиликни яшириб бўлмайди. Чайқовчиларнинг бетини ёпсанг, қийшиқ қўли ёки олти бармоқли оёғи кўриниб қолаверади.