Ипотеканинг ўсиши секинлашишда, муаммоли кредитлар мўъжизавий қисқаришда давом этмоқда Июнь ойида банкларнинг кредит қўйилмалари 7,6 трлн.сўмга ўсиб, 575,2 трлн.сўмга етган. Бунда чакана кредит қолдиғи 3,2 трлн.сўмга, корпоратив кредит қолдиғи 4,4 трлн.сўмга кўпайган. Чакана кредитлашнинг асосий маҳсулоти микроқарзлигича қолмоқда (+2,7 трлн.сўм). Ипотеканинг ўсиши учинчи ойдирки секинлашмоқда (+756 млрд.сўм). Марказий банк ниҳоят автокредитларни истеъмол кредитлардан ажратган. Негизини автокредитлар ташкил этган истеъмол кредитлари қолдиғи 1,1 трлн.сўмга қисқарган. Бошқа тоифадаги чакана кредитлар қолдиғи, эҳтимолки бу кредит карталари, 166 млрд.сўмга кўпайган. Ой давомида кредит қўйилмаларининг энг катта ўсиши Агробанк (3,1 трлн.сўм), Капиталбанк (1,1 трлн.сўм) ва Миллий банкда (768 млрд.сўм). Ярим йиллик охирида анъанага мувофиқ, банклар муаммоли кредитларни яхшигина қисқартиришган. Муаммоли кредитлар қолдиғи 1,7 трлн.сўмга, 21,9 трлн.сўмгача камайган (NPL улуши 3,8%га туширилган). Муаммоли кредитларни қисқартиришда Ипотекабанк (1,0 трлн.сўм), Миллийбанк (877 млрд.сўм) ва БРБ (419 млрд.сўм) фаоллик кўрсатишган. Муаммоли кредитларнинг қисқариши омиллари охирги йилларда бу том маънода фақат кредитларни амалий сўндириш эмас, қарздорликни ҳисобдан чиқариш (списание), гаров мулкини балансга олиш ёки турли кўринишларда реструктуризация шаклларида намоён бўлмоқда. Марказий банк картина тўкислиги учун балансдан ташқаридаги ҳисобдан чиқарилган кредитлар ва фоизлар, банк балансига олинган, бўлиб тўлашга берилган мулклар, шунингдек реструктуризация қилинган (пролонгация билан бирга) кредитлар тўғрисида ҳам ахборот бериб борса бўларди.