Ипотека фаоллашган, автокредитлаш сўнишда давом этмоқда Июль ойида тижорат банкларининг кредит қўйилмалари фаол ўсган. Ой давомида умумий кредит портфели 6,7 трлн.сўмга кўпайиб, 500,6 трлн.сўмга етган. Чакана кредитлашда (+2,9 трлн.сўм) ниҳоят йил давомида биринчи марта ипотека қолдиғи 1 трлн.сўмдан кўпга ўсган, лекин энг асосий маҳсулот микроқарз бўлиб қолмоқда (+1,4 трлн.сўм). Негизини автокредитлар ташкил этувчи истеъмол кредитлари иккинчи ой кетма-кет қисқармоқда (-320 млрд.сўм). Корпоратив портфелнинг ўсиши (+3,8 трлн.сўм) асосан учта банкда ОФБ (+1,8 трлн.сўм), Миллий банк (+1,0 трлн.сўм) ва Капиталбанкда (+516,0 млрд.сўм) рўй берган. Муаммоли кредитларнинг ҳалинчаги давом этмоқда. Июнь ойида муаммоли кредитлар 935,7 млрд.сўмга қисқарган бўлса, июлда муаммоли кредитлар 820,0 млрд.сўмга ошган. Бундай динамикани хусусан бир омил — айрим банкларда июнда ярим йиллик ҳисоботларга чирой бериш учун муаммоли кредитларнинг яшириб камайтирилгани, июлда эса яна жойига қайтарилгани билан изоҳласа бўлади (2023 йил декабрь ва 2024 йил январда ҳам худди шундай картина ясалган).