Депозитлар оқими юқорилигича қолмоқда Июль ойида тижорат банкларининг депозит портфели қарийб 10 трлн.сўмга ошган ва умумий қолдиғи 275,4 трлн.сўмга етган. Бунда корпоратив депозитлар қолдиғи 6,7 трлн.сўмга, чакана депозитлар эса камтарроқ, 3,2 трлн.сўмга ўсган. Тўртта банк депозит портфелини 1 трлн.сўмдан кўпроққа ўстиришга муваффақ бўлган: ОФБ (+2,2 трлн.сўм), ЎзКДБ банк (+1,8 трлн.сўм), Халқ банки (+1,2 трлн.сўм) ва Асакабанк (+1,1 трлн.сўм). Аҳоли омонатлари бозорида Капиталбанк (+487 млрд.сўм), Анорбанк (+394 млрд.сўм) ва Ҳамкорбанк (+311 млрд.сўм) қолган банклардан фаолроқ бўлган. Омонатлар бозоридаги 10та энг йирик банк жами омонатларнинг 55,7%лик қисмини назорат қилмоқда, уларнинг 6таси давлат банки, 4таси хусусий банклар. 100 трлн.сўмдан ошган омонатларнинг сезиларли қисми норезидентларга тегишли эканини қайд этиб ўтиш лозим, айниқса, Россиянинг Украинага босқинчилик уруши бошлангандан кейин, шунингдек, жозибали юқори фоизлар амал қилаётган охирги 2 йилда шимоллик норезидентлардан омонатларнинг оқими кўпайган. Қайд этиш лозим, омонатларнинг кафолатлаш тизими Ўзбекистон Республикаси фуқаролари, чет эллик фуқаролар ва фуқаролиги бўлмаган шахсларга бирдек амал қилади.