OTP Group қанотига ўтган Ипотекабанк тозаланмоқда Июль ойида ўзбек банкларининг муаммоли кредитлари қолдиғи 1,4 трлн.сўмдан ортиққа кўпайган ва 15,7 трлн.сўмга етган. NPLнинг ўсиши 1,1 трлн.сўмлик қисми Ипотекабанк ҳисобига тўғри келади. Можорлар назоратига ўтгандан кейин иккинчи ой кетма-кет кредит қўйилмалари сифатини реал акс эттириш, яъни муаммоли кредитларни тан олиш жараёни кетмоқда. Яъни бу билан Ипотекабанк давлат назоратида қолган банклардан ёмонроқ бўлиб қолгани йўқ, қайтанга тозаланишнинг, истиқболдаги соғлом ўсишнинг замини яратилмоқда. Можорлар қўлига ўтгунча энг яхши давлат банкларидан бўлган Ипотекабанкка қиёсан олинса, бошқа давлат банкларидаги реал NPL кўрсаткичини ва асл молиявий натижаларни ўзингиз чамалаб олаверасиз. Умуман олганда, июль ойида кредитлаш жараёни анча фаоллашган. Ой давомида банкларнинг кредит қўйилмалари 6,5 трлн.сўмга ошиб, 430,2 трлн.сўмга етган. Банклар қирқимида кредит қўйилмаларининг энг катта ўсиши Ўзсаноатқурилишбанк ҳисобига тўғри келади (+1,4 трлн.сўм). Маҳсулотлар қирқимида чакана кредитлар қолдиғи 4,7 трлн.сўмга, корпоратив кредитлар қолдиғи эса 1,7 трлн.сўмга ошган. Автокредитлар бўйича риск шкаласи қаттиқлаштирилиши олдидан, банклар асоси автокредитлар бўлган истеъмол кредитлари беришни жудаям фаоллаштиришган (+2,6 трлн.сўм). Ой давомида ипотека қолдиғи 1,0 трлн.сўмлик ошган. Оилавий тадбиркорлик учун кредитлар қолдиғи эса камтарона 188,0 млрд.сўмга кўпайган холос (бу катта миқдорда имтиёзли кредитлар балансдан "списание" қилинаётгани билан ҳам боғлиқ бўлиши мумкин).