​NPL ҳалинчаги давом этмоқда Июль ойида банкларнинг жами кредит қўйилмалари камтаргина 1,8 трлн.сўмга ошиб, 644,6 трлн.сўмга етган. Бунда корпоратив кредитлар қолдиғи 2,1 трлн.сўмга қисқарган бўлса, чакана кредитлар қолдиғи 3,9 трлн.сўмга ортган. Умумий ўсишнинг асосий қисмини ипотека ва банклар учун янги нефтга айланган, пруденциал чекловлари йўқ, аксарида таъминотсиз ажратилаётган микрокредитлар бермоқда. Банклар қирқимида кредит қўйилмаларининг энг катта ўсишини Агробанк (+1,4 трлн.сўм), Алоқабанк (742 млрд.сўм) ва Ҳамкорбанк (+733 млрд.сўм) таъминлаган. Ўтган ойдаги ярим йилликка қадалган "яхшиланишдан" кейин банкларнинг кредит портфели яна ёмонлашган. Ой давомида муаммоли кредитлар қолдиғи 986 млрд.сўмга ўсган ва 23,9 трлн.сўмга етган (NPL улуши 3,7%). Муаммоли кредитларнинг қийматда энг кўп ўсиши Микрокредитбанк (+485 млрд.сўм), Капиталбанк (+382 млрд.сўм) ва Анорбанкда (+46 млрд.сўм) кузатилган. Микрокредитбанкдаги кескин ўсиш, эҳтимолки, янги раҳбариятнинг координата бошида реал картинани очиқлаб олиш қадами билан боғлиқ бўлиши мумкин (исталган давлат банкида раҳбар алмашганида кузатиладиган ҳолат).