Асосий ставкани кўриб чиқиш бўйича кечиктирилган йиғилиш ўтказилмайдими? Марказий банк бошқарувининг 24 июлга белгиланган таянч йиғилиши номаълум муддатга қолдирилган эди. Бунга сабаб ўлароқ биринчи ярим йиллик якунлари бўйича глобал макроиқтисодий кўрсаткичлар ва савдо ҳамкорлар иқтисодиёти бўйича маълумотлар июль ойининг охирида эълон қилиниши ҳамда ишлаб чиқилаётган макроиқтисодий таҳлил ва прогнозларда ушбу янгиланган кўрсаткичлар асос бўлиши айтилганди. Шунгаям 25 кун ўтди. Ярим йилликнинг барча асосий ҳисоботлари эълон қилинди, ҳатто июль маълумотлари чиқа бошлади. Лекин кечиккан таянч йиғилишининг янги санаси эълон қилинмади. Қизиғи, яна 24 кундан кейин, 11 сентябрь куни навбатдаги оралиқ йиғилиш ўтиши керак. Яъни таянч йиғилишдан кўра оралиқ йиғилиш санаси энди яқинроқ (орада байрам таътиллар борлигиниям ҳисобга олиш лозим). Асосий ставка 24 кун ичида икки марта қайта кўриб чиқилмаса керак. Энг муҳим коммуникация сигналлари бериладиган асосий ставкани кўриб чиқиш бўйича бошқарув йиғилишларининг қолдирилиши (бу йилнинг ўзида 2 марта) олқишланадиган практика эмас. Таянч йиғилишларидан кейинги анъанавий матбуот анжуманлари медиа учун янги даврдаги энг муҳим иқтисодий ва молиявий мулоқот каналига айланиб қолганини эслатмасак ҳам, ҳамма билади.