Бензин қимматлашиши учун ҳамма қийшиқ ишни қилиб туриб бензин қимматлаганидан ҳайрон бўлмаслик керак Охирги 2 ойда олигархия ва монополистлар бензин нархини сунъий равишда ошириб олиши учун ҳамма нарса қилинди. Ҳатто энг охирги тўсиқ бўлган потолок спред ҳам олиб ташланди. Шунинг учун ҳали куз келмай туриб, бензин чакана нархлари осмонга сакрашдан тўхтамаётганидан ҳайрон бўлмаслик лозим. Олигархия, монополистлар пиширган ош. Ҳатто антимонополия органи қийшиқ ва бузуқ ўйинларни кўра-била туриб, жараённи оқлаб-кўклаб берди (гўёки потолок спред яширин коррупцион каналларни яратганмиш). Ҳа, барака топгур, коррупцион каналлар пайдо бўлган бўлса, коррупцион каналларга қарши курашиш керак, потолок спредни йўқотиш эмас, дейдиган мард топилмади (балки бу яширин каналлар ўша олигархия ва монополистларга қараб етаклар?). Прогноз қилганимиздек, қўшимчасига, шимолдагиларнинг (олигархия ва монополистларимизнинг севимли оғалари) бензин экспортига чекловлари ҳам, шиптир лақабли 80 бензиннинг шиптир плюс лақабли 92 бензинга трансформацияси ҳам нархларни ошириб олишга зўр баҳона бўлди. Идеал штром. Абсурд шундаки, шу ишларнинг ҳаммаси "92 бензин арзонлади", деган ёлғон соуси билан амалга оширилди ва оширилмоқда. Аввалги энергоёлғонлар серияси (1, 2, 3...) учун ҳеч қандай жавобгарлик бўлмаганидек, бу сафар ҳам жавобгарлик бўлмайди, шундай экан, бензин нархи сунъий ўсишдан тўхтамай давом этаверади. Ҳа, Статқўм ҳам "бензин арзонлади" ёлғонини ҳисоботида акс эттириб қўллаворса, масала ҳал. Ҳалқа ёпилади.