Рақамли платформалар орқали экспорт қилувчилар ҳам ҚҚСни қайтаришлари мумкин Давлат раҳбари билан мулоқотга тайёргарлик учрашувларида жуда кўп тадбиркорлар миллий ва хорижий маркетплейсларда четга сотган товари учун ҚҚСни қайтариш тизимини йўлга қўйишни сўрашган эди. Улар ҳам тадбиркор, экспортчи, фақат рақамли платформалар орқали экспорт қилишади. Суммалар миллионлаб доллар эмасдир, лекин кичик бизнес учун катта бозорларга чиқишда бундан қулай каналлар йўқ. Ўзбекистонликлар AliExpress, Ozon ёки ўзимизнинг Uzum каби платформалардан импорт қилишни ўрганди, лекин айни шу платформалардан экспорт қилишда фойдаланишда имкониятлар тўлиқ ишлатилаётгани йўқ. Рақамли платформалар орқали экспорт қилувчилар ҳам ҚҚСни худди анъанавий экспортчилар каби қайтариб олишлари мумкинлиги мазкур сегментдаги тадбиркор ва ҳунармандларга катта рағбат беради. Давлат раҳбари мутасаддиларга бунинг тартибини тасдиқлаб, амалиётга жорий қилиш вазифасини топширди.