​Тарихимизни халқимизга кенгроқ етказиш керак Бугун Шаҳидлар хотираси хиёбонида Қатағон қурбонлари руҳи-покларини ёд этиш тадбирларида иштирок этган Давлат раҳбари яқин ўтмишдаги тарихимизни халқимизга кенгроқ етказиш ҳақида гапирган. Уч минг йиллик давлатчилигимизни қарийб етмиш йилга узиб қўйган совет оккупацияси даврида 100 мингдан зиёд бегуноҳ ватандошимиз қатағон қилингани, минглаб юртдошларимиз “халқ душмани” деган ноҳақ айблов билан отиб ташлангани, ундан ҳам кўпи сургун қилингани бугун ёд этилмоқда. "Жадид боболаримиз ҳар соҳада илғор эди. Биринчи ўзбек романи, театр ва кино асарлари, турли фанлар бўйича дарсликларни айнан улар яратган. Ўтган асрнинг 20-йилларида Германияда таҳсил олган туркистонлик талабалар қатағон қилинмаганида, бутун жамиятни ўзгартирарди. Бор тарихимизни тўғри етказа олсак, ёшларимиз бошқа қаҳрамон изламайди, етук боболаримиз бунинг учун тайёр намуна", – деган Давлат раҳбари. Шунингдек, бугунги дунёдаги таҳликали бир вазиятда давлатларнинг мустақиллигига таҳдидлар пайдо бўлаётгани, бундай мураккаб замонда умуммиллий бирлик ва барқаролик зарурлиги, ислоҳотларни изчил давом эттириш кераклиги қайд этилган.