Қатағон даври архивлари очилиши керак Бугун 4 октябрь. Ўзбек элитаси - ойдинлар кундага солинган кун. Поляклар Совет босқинидан кейин юз берган қатлиомни Катин фожеаси деб айтади. Катин фожеасида қатл этилган ҳар бир полякнинг қандай ҳибс этилгани, қаерга олиб кетилгани, ким сўроққа тутгани, кимлар отувга ҳукм қилгани, қаерда отилганигагача ахборотларни тиклай олишган. Қатағонга учраган ва жисмонан йўқ қилинган ҳар бир поляк ойдини поляклар қалбида яшашда давом этиши учун шундай қилинган. Бундай босқинлар ва зўравонликлар қайта такрорланмаслиги учун шундай қилинган. Биз Чўлпонларни ким ҳибс этгани, кимлар сотгани, кимлар чақиб бергани, кимлар сўроққа тутгани, кимлар қийнагани, кимлар судлагани ва кимлар отганини биламизми? Йўқ. Шунинг учун ҳам миллион марта гапирганимиз билан тарихий хотира шаклланмаган миллатда. Шунинг учун ҳам қийноқлар, зўравонликлар янги ва янги тўлқинлар билан давом этаверади. Суд дейилгани аллақачон чиқарилган ҳукмни, топшириқни ижро этувчи бир машиналигича қолаверади. Чунки биз нуқта қўя олмадик. Бундан 2 йил аввал 1917 йилгача бўлган даврдаги архивлар очилди. Лекин миллат бир неча бор қирилган 1918 йилдан 1953 йилгача бўлган давр архивлари ҳалигача ёпиқ ва махфийлигича қолмоқда. Нима учунлиги менга тушунарсиз. Ахир Чўлпонларни отганлар, сотганлар, чаққанлар, судлаганларнинг биронтаси ҳаёт эмаску. Уларга инсоний суд берадиган жазо энди имконсиз. Қандай тавқи лаънат орттиришган бўлса худонинг жазоси муқаррар албатта. Қатағон ҳеч қачон бошқа такрорланмаслиги учун нима ва қандай бўлганини ҳамма ва ҳар доим билмоғи лозим. Занжирни узиш вақти келди. @the_bakiroo