Исм рақамлардан тушган маблағлар қаёққа ишлатилади? Ўзбекистонда ким кўп, пул топиб, ақл топмаганлар кўп. Коррупцион даромадларини қандай ўзлаштиришни билмай юрганлар унданам кўп. Бу коррупционерлар-у, олигархларнинг турли жиян, уруғ ва қариндошларининг эса саноғи йўқ. Ҳашамати, ялтироқ ҳаёти ва бошқалардан устунлигини кўз-кўз қилишга эҳтиёж эса потираб ўсиб бормоқда. Уларга қиммат мошин кам, тонировка кам, қиммат номер кам, қани энди шу бир парча темирга исминиям ёзволса. Шундай экан, 2026 йил 1 январдан бошлаб автомототранспорт воситалари учун олтитагача ҳарф ва/ёки рақамлар комбинациясидан иборат бўлган "ноёб" давлат рақами белгиларини аукционда сотилиши яхши қадам. Афсонавий Робин Гуд талончи бойларни қоқиштириб пул олганку, шунинг маданийлашган кўриниши. Энди шу Робин Гуд бўлгач, охиригача бўлиш керак. Исм рақамлардан тушган миллардлаб пулларни манзилли ишлатиш, ижтимоий соҳага ва ижтимоий қатламларга йўналтириш керак. Масалан, бир ёмғирдан кейин уқаланиб, ювилиб кетмайдиган тротуарлар учун, пиёдалар ўтиш йўлакларида светофорлар ўрнатиш учун, имконияти чекланганлар ҳаракатланишига ёрдам берадиган инфратузилма яратиш учун. Яна ошса, жамоат транспорти учун. Шунда адолат таъминланади. Халқдан турли йўллар билан кўчган маблағлар яна халқ хизматига қайтади.