7 миллионлик авторақам ва умуман чиройли рақамлар учун тўловнинг қанча қисми бюджетга, яна қанчаси яширин "хусусий шерикка" тушади? Курбанов "янгича тартиб" бўйича исталган оддий рақамни, масалан, оддийгина 492 рақамини расмийлаштириш 7 миллион 4 минг сўмга (17 БҲМ) тушиши мумкинлигига эътибор қаратмоқда. Эмишки, бу танлов учун тўловмиш. Бу механизм авторақам сотиш билан боғлиқ триллионлаб тушумларни яна каррасига оширади (ўзи шунинг учун дўкон пештахтаси кенгайтирилди). Хўп, ниманики сотиб пул қилиш, янги ва янги ўйлаб топилаётган тўловларни ўзбекистонликлар гарданига юклаш мумкин бўлса, бу тушумлар қаёққа сарфланади, қандай тақсимланади деган, саволга ҳам жавоб олишимиз керак. Бюджетда пул йўқ, деб қуёш панел қўйганларга пул тўланмай ётган, йўллар, инфратузилма, жамоат транспорти бир аҳволда ҳолатда бу муҳим эмасми? Хўп, 17 БҲМнинг қанчаси бюджетга тушади, яна қанчаси яширин қарор билан автомобиль рақамларини ишлаб чиқариш бўйича "хусусий шерик"нинг ҳисобига ўтади (ва кейин Дубайга ҳайдалади)? Иккинчи савол: Нима учун рақам сотиб олиш хизматидан фақат Safe Road ЙҲХХ иловаси орқали фойдаланиш мумкин. Нега My.gov,uz'дан эмас, ёки Road24'дан ё исталган тўлов ташкилотидан эмас? Safe Road'га ихтиёрий-мажбурий равишда монополият топширилганми? Ҳар йили триллион сўмга яқин миқдорда чиройли авторақамлар сотилиб келган (2024 йиллик маълумот очилмаган, ярим йилда 426,2 млрд.сўмга авторақамм сотилган). Бу пуллар қандай тақсимланди? Қанчаси Дубайдаги чўнтакларга оқди, қанчаси бюджетга тушди? 1,5 йил аввал автотранспорт воситаларини рўйхатдан ўтказиш ва қайта рўйхатдан ўтказиш учун тўлов (техпаспорт учун) миқдори 68 карра оширилганди. Бу триллионлар қандай тақсимланмоқда ва нима мақсадларга ишлатилмоқда? Ўзбекистонликларни сўрашга, билишга ҳаққи борми? Йўқ, десанглар, нима учунлигини айтиш керак бўлади.