Августда бензин импорти сезиларли ошган Июлдаги кескин қисқаришдан (97,7 млн.доллар) кейин августда 109,6 млн.долларлик бензин импорт қилинган. Лекин ёпиқ протоколлардаги чўнтак импортчилар назоратидаги импортнинг ошгани нархлар ошишини тўхтатмайди. Газ импорти юқорилигича қолмоқда (151,9 млн.доллар). Импорт газнинг тақсимоти қандай бўлаётгани ҳалигача махфия (ҳаммаси аҳолига кетаяпти деб субсидия ўзлаштирилмоқдами ёки қайсидир қисми яширин қарорлар билан реэкспорт қилинмоқдами?). Иситиш мавсумига нари борса 40 кун қолганига қарамай, омборларга қамалаётган газ ҳажми ҳақида ҳам бирон расмий маълумот йўқ. Газ экспорти 56,1 млн.долларни ташкил этган, 8 ойда экспорт қилинган газнинг пулдаги қиймати қарийб ярим миллиард долларга етган (ҳажмда 2,4-2,5 млрд.куб газ). Августда экспорт хизматлар экспорти ҳисобига ўсиш суръатини сақлаб қолган. 721,5 млн.долларлик олтин экспорт бўлган, 8 ойдаги олтин экспорти ҳажми 8 425,1 млн.долларга етган. Бу барча даврлар учун мутлақ янги рекорд (йиллик рекордларни ҳам ортда қолдирган). Агар суръат сақланиб қолса, сентябрь якуни билан Афғонистон Қозоғистонни ортда қолдириб, учинчи экспорт ҳамкоримизга айланади. Протекционизм тўсиқлари ҳисобига ўтган йили қисқарган автомобиллар импорти яна тикланмоқда (хусусан, чайқовчи монополистларнинг "запчасть" дея импорт қилиши ҳисобига). Августда 110,7 млн.долларлик автомобиль импорт қилинган бўлса, 147,7 млн.долларлик "запчасть" импорт бўлган.