Ўзбекнефтгаз Lukoil билан қўшма лойиҳаларга таъсир этувчи АҚШ санкциялари бўйича музокаралар олиб бормоқда Ўзбекнефтгаз давлат компанияси ва Россиянинг Lukoil нефть-газ компанияси АҚШ санкцияларининг Ўзбекистондаги қўшма лойиҳаларга бўлиши мумкин бўлган таъсирини муҳокама қилмоқда. Бу ҳақда Ўзбекнефтгаз бошқарув раиси Баҳодир Сидиқов Gazeta’га берган интервьюсида маълум қилган. Сидиқов жорий этилган чекловларни муҳокама қилиш учун 28 октябрь куни Lukoil билан учрашув режалаштирилганини айтган. Унинг фикрича, ҳозирча Ўзбекистон томонидан Россия активларини сотиб олиш масаласи кўтарилмайди. «Менимча, ҳозир сотиб олиш масаласи кўтарилмайди. Ҳозир Lukoil’нинг позициясини ҳам эшитамиз. Ўйлашимча, бундай муддатда қандайдир объектни сотиб олиш, бошқа ҳар қандай давлат учун ҳам, ҳақиқатга тўғри келмайди. 21 ноябргача нарх бўйича келишиш… Масалан, мен бундай вазиятда сотмаган бўлардим», — деган у. Сидиқов санкциялар Lukoil фаолияти ва Ўзбекистондаги қўшма лойиҳаларга муқаррар таъсир кўрсатишини эътироф этган. «Ҳар қандай ҳолатда ҳам бу уларнинг ва бизнинг фаолиятимизга таъсир қилади. У ерда улар билан молиявий алоқалар ўрнатиш имконсиз бўлади. Бугун биз барча вариантларни муҳокама қиламиз, — деган Ўзбекнефтгаз раҳбари.