Қарзлари узайтирилган Кластерлар 3 йил деганда биринчи марта фойда қайд этган Статқўм маълумотларига кўра, 2025 йил 1 октябрь ҳолатига фаолият кўрсатган 383та кластер мақомидаги корхоналар 68 млрд.сўм миқдорида фойда солиғини тўлашга қадар фойда қайд этишган. Солиштириш учун, ўтган йилнинг шу даврида 384та кластер 426 млрд.сўмлик зарар кўрсатишган эди. Айтиш керакки, кластер мақомидаги корхоналар 2022 йилдан буён биринчи марта фойдага киришмоқда, кластерлар 2023, 2024 ва 2025 йилнинг ярим йиллигини триллионлаб зарар билан якунлашган. Ўзбекистонда вертикал интеграциялашган кластерлар давлат таъсири юқори даражада сақланиб қолаётган пахтачилик ва ғаллачиликда хўжалик юритишнинг асосий шаклига айланган. Ҳисоботга қайтсак. Кластерларнинг ишлаб чиқарган маҳсулот ҳажми 23,9 трлн.сўмгача камайган (ўтган йили шу даврда 24,0 трлн.сўм). Кластерлар 9 ойда 7 438 иш ўрни очишган (ўтган йили шу даврда 14 099 нафар). Айни пайтда кластерларнинг қарзлари камайган. Дебитор қарзлар 4,8 трлн.сўмгача (ўтган йили шу даврда 6,4 трлн.сўм), кредитор қарзлар 6,5 трлн.сўмгача (ўтган йили шу даврда 9,2 трлн.сўм) қисқарган. Август ойида Давлат раҳбари кластерларнинг қарзларини яна 5 йилга узайтириш ва пенялардан воз кечилиши ҳақида топшириқ берганди. Солиқ қўмитаси раиси июль ойида тадбиркорлар билан учрашув пайтида кластерларнинг фермерлар олдида жуда катта қарздорлиги мавжудлиги, бунинг оқибатида фермерлар солиқ тўламаётгани, ойлик беролмаётгани, кредитларни ёполмаётгани ҳақида гапирганди.