Очиқ энергодебат бўладими? Энергетика вазирини парламент гиламига чақиришди Қонунчилик палатасининг кечаги ялпи мажлисининг охирида (3:10:45 дан кўринг), депутат Аҳмедов ҳудудларда истеъмолчиларни сифатли ва узлуксиз электр энергияси билан таъминлаш билан боғлиқ муаммолар сақланиб қолаётганини таъкидлаб, Энергетика вазирининг ҳисоботини парламент эшитувига киритишни таклиф қилган. Депутат Аҳмедов парламентга мурожаатларнинг аксарият қисми энергетика масалалари билан боғлиқ бўлиб, уларда асосан электр энергияси ва газ таъминотдаги узилишлар, хизмат кўрсатиш сифатининг етарли даражада эмаслиги, авария ҳолатларнинг ўз вақтида бартараф этилмаётганлиги каби муаммолар эканини қайд этган. Парламент қуйи палатаси депутатнинг Аҳмедовнинг таклифини маъқуллаган. Яқин орада Энергетика вазирини парламентда кўриб қолсак керак. Ўйлаймизки, депутатлар вазирдан энергетик тарамоқларини таъмирлаш ва янгилаш мақсадларида сарфланаётган триллионлаб маблағларнинг натижаси ва самарасини ҳам, тендерсиз битимларни ҳам, неча йилдирки қулашдан тўхтамаётган газ ва нефть қазиб олиш масаласини ҳам, газ импортидаги чайқовчи ўртамчилар ва субсидиялар кимнинг чўнтагига тушаётгани ҳақида ҳам саволларни кўтаришади.