АҚШда 92 бензин нархи Ўзбекистондагидан 2 карра арзон Кеча Президент Трампнинг Politico нашрига берган интервьюсида бир галлон бензин нархи 1,99 долларгача (литри 52 цент ёки 6 200 сўм) тушиб кетгани ҳақидаги гапларига, тўғриси, унча ишонқирамагандим. Охирги кунларда АҚШда бензин нархлари кўп йиллик тарихий минимумларгача арзонлагани ҳақида бошқа ҳурматли манбалар ҳам ёза бошлашди. S&P Global таҳлилларига кўра, CBOB 87 (бизнингча, 92 марка) нархи галлони 1,67 долларгача ёки литри 5 300 сўмгача тушган. Нархларнинг пасайиши бензин захираларининг ортаётгани ва истеъмол талабининг паст қолаётгани билан боғланмоқда. Мазкур ҳафтада Америка бозори учун эталон ҳисобланган Crude Oil WTI (West Texas Intermediate) нархи 60 доллардан 58 долларгача тушган. АҚШда олигархия ва монополистлар назоратидаги Ўзбекистондан фарқли ўлароқ, нефть нархининг арзонлашиши ҳар доим бензин арзонлашишига асосий ва корреляцион омил бўлиб хизмат қилади. Нефть нархи қулаётгани, сўм мустаҳкамланаётганига қарамай, Ўзбекистонда бензин қимматлашишдан тўхтагани йўқ, бу кетишда тўхтамайди ҳам.