Нефть нархлари яна қулади, Ўзбекистонда бензин барибир арзонламайди Брент типидаги нефть нархи ўтган ҳафтадаги нархларга нисбатан қарийб 10 долларга 76,7 долларгача арзонлашди. ОПЕК+нинг нефть қазиб олиш ҳажмини ихтиёрий қисқартириш бўйича икки йирик келишувлари муддати яна узайтирилгани ҳам тенденцияни ҳозирча тўхтата олгани йўқ. Геосиёсий зиддиятларнинг юмшаши эҳтимоли ва Хитой иқтисодиётидаги талабнинг пасайиши омиллари сабабли нефть нархига пасайтирувчи босим ортишда давом этиши кутилмалари мавжуд. Лекин глобал бозорларда нефть нархининг тушаётгани Ўзбекистонда ҳеч қачон мутаносиб акс садо бермаган, ўтган йили декабрдаям шундай, февралдаям шундай бўлган, ҳозир ҳам шундай. Нефть нархи ошса, бензин қимматлайди, нефть арзонлашса бензин нархи энг яхши ҳолатда ўзгармайди. Чунки ўзаро чатишиб кетган ва шимолдаги оғаларига боғланган монополия ва олигархат учун бензин ҳар доим ўзбекистонликларни қоқиштириш ва талаш воситаларидан бири бўлиб келган. Бозор қоидалари ишлайдиган мамлакатларда, нефть нархининг арзонлашиши ва бензин нархлари юқори корреляцион боғлиқликка эга. Масалан, бугун АҚШда бензиннинг биржа котировкалари бир галлони учун 230 центгача тушган, бу литр бензин 7 700 сўм дегани.