Монополиялар истеъмолчиларгаям, давлатгаям зиён Ўзбек монополистлари нафақат истеъмолчиларни танловсиз таловчи сифатида коппор зиёнкор, балки давлат ва бюджет учун ҳам самарасиз ва том маънода манфий манба (беришидан олиши кўп) ҳисобланади. Солиқ тушумларининг қисқариб бораётгани бунга яққол мисол. 2025 йил 10 ой якунлари билан Ўзбекнефтегазнинг солиқ тушумлари ўтган йилнинг шу даврига нисбатан 18,1%га ёки 3,7 трлн.сўмдан 3,0 трлн.сўмга қисқариб кетган бўлса, UzAutoMotors'дан солиқ тушумларининг қулаши янада чуқурроқ бўлган. 30 йиллик монополистнинг солиқ тушумлари 46,3%га ёки 3,0 трлн.сўмдан 1,6 трлн.сўмгача қисқарган (UzAutoMotors яширин қарор билан утилизация йиғимларини тўламаслигини билсангиз керак). Рўйхатга яна назар солсак, монополист деб тан олинмаган монополист маҳаллийлаштирувчилардаям шу аҳвол. Хусусан, "маиший техника ишлаб чиқарувчи" Artel Electronics Manufacturing TOP20 солиқ тўловчилар рўйхатидан умуман тушиб қолган бўлса, "автомобиль ишлаб чиқарувчи" ADM Jizzakh'нинг солиқ тушумлари қисқаришни бошлаган. Айни пайтда рақобатли бозорда фаолият кўрсатаётган субъектлар солиқ тушумларини оширишда давом этишмоқда. Масалан, Coca cola ишлаб чиқарувчилар тўлаган солиқлар 1,74 карра (932,1 млрд.сўм) ошган бўлса, Pepsi ишлаб чиқарувчиларнинг тўлаган солиқлари 1,66 карра (530,6 млр.сўм) ошган.