Ироқлик тадбиркорлар Ўзбекистонда Савдо-иқтисодий ҳамкорлик масалаларини муҳокама қилиш мақсадида Ироқдан 150 нафарга яқин тадбиркор Ўзбекистонга келган. Айтилишича, ташриф Савдо-саноат палатаси ва Ўзбекистоннинг Кувайтдаги элчихонаси ташаббуси билан ташкил қилинган. Дастурга кўра, делегация аъзолари Тошкент ва Ургутда ўтказиладиган бизнес-форумларда иштирок этади. Шунингдек, электротехника, қурилиш материаллари, мебель, фармацевтика ва озиқ-овқат саноати соҳаларига оид корхона ва кўргазмалар билан ҳам танишиш кутилмоқда. Учрашувлар давомида ўзбек ва Ироқ тадбиркорлари ўртасида тўғридан тўғри мулоқотни йўлга қўйиш, ҳамкорлик имкониятларини муҳокама қилиш масалалари кўзда тутилган. Томонлар, шунингдек, мавжуд ишбилармонлик алоқаларини кенгайтириш масалалари юзасидан ҳам фикр алмашади. Ироқ — 46 млн аҳолига эга, йиллик 85 млрд долларлик импорт ҳажми билан бизнес ва экспортчилар учун катта бозор.