Очиқ мулоқотда тадбиркор кўтарган масала жойида ҳал қилинди Очиқ мулоқотларда айтилган гаплар ҳавога учиб кетади, деган хавотир ҳали-ҳануз бор. Лекин электротехника соҳасидаги тадбиркорлар билан бўлиб ўтган сўнгги очиқ мулоқот шу стереотипни синдирди. «Ideal Electrolux» корхонаси раҳбари Соҳиб Азимов Россия ҳамда қўшни давлатлар бозорида маҳсулотни самарали сотиш учун сервис хизматларини йўлга қўйиш зарурлигини таъкидлади. Унинг айтишича, марказлаштирилган сервис тизими мавжуд бўлмаса, экспортни барқарор ошириш қийин. Масала Ҳукумат комиссиясига киритилди. Негаки, бундай очиқ мулоқотларда масалани ечиш учун Ҳукумат комиссиясининг ўзи етарли ваколатга эга. Ҳукумат комиссиясининг бу йўналишдаги икки энг муҳим ваколатига алоҳида тўхталиб ўтиш ўринли. Биринчидан, комиссия томонидан қабул қилинган қарорлар тегишли давлат идоралари учун мажбурий ҳисобланади. Иккинчидан, комиссия экспортни қўллаб-қувватлаш механизмларини тезкор тарзда қайта кўриб чиқиш ваколатига эга. Айнан шундай ёндашув очиқ мулоқотларнинг аҳамиятини оширади. Масала кўтарилди, эшитилди ва имконият даражасида ечимга йўналтирилди. Очиқ мулоқотдан кутиладиган натижа ҳам шу.