"Дизайн код тўғрисидаги қарорнинг айрим бандлари амалдаги қонунчиликка зид ва қарор бизнес омбудсман билан келишилмаган" Бизнес омбудсманга кўра, Тошкент шаҳрининг дизайн коди қоидаларини амалиётга жорий этиш чора-тадбирлари белгиланган бўлиб, ўрганиш натижасида ҳужжатнинг айрим бандлари амалдаги қонунчиликка зид экани аниқланган. «Норматив-ҳуқуқий ҳужжатлар тўғрисида»ги қонун талабларига кўра, тадбиркорлик фаолиятига таъсир этувчи лойиҳалар Бизнес-омбудсман билан келишилиши керак. Бироқ ушбу қарор вакил билан келишилмасдан қабул қилинган. Ёзилишича, қарорда реклама воситалари учун белгиланган «паст тўйинган» ёки «нейтрал» ранг каби тушунчаларнинг ҳуқуқий мезони очиб берилмаган. Бундан ташқари, вакил рангларни бир хиллаштириш талаби тадбиркорларнинг интеллектуал мулк (рўйхатдан ўтган бренд) ҳуқуқларига зарар етказиши мумкин эканини билдирган. Бир неча объектларга эга бўлган тармоқ ташкил этган брендларнинг манфаатлари инобатга олинмаган. Бизнес-омбудсман томонидан Халқ депутатлари Тошкент шаҳри кенгашига мазкур қарорнинг тадбиркорлик фаолиятига дахлдор қисмларини қайта кўриб чиқиш, нормаларга ўзгартириш киритиш ва кучга кириш муддатини узайтириш юзасидан расмий хулоса киритилган. Шунингдек, Вакил девони мазкур жараённи тадбиркорлик субъектлари манфаатларини инобатга олган ҳолда, бевосита Вакил ходимлари иштирокида қайта ишлашни таклиф этган.