Электромобилни зарядлашга 70%лик субсидия берилади — газлашмаган хонадонлар учун электрга 50% чегирма кутиб турадими? Энергетика вазирлиги электромобилларни қувватлаш станцияларида 1 кВт.соат электр энергияси нархининг 300 сўмдан ошган қисмини Давлат бюджети маблағлари ҳисобидан қоплаб бериш бўйича ҳукумат қарори лойиҳасини ишлаб чиққан. Қайд этилишича, субсидия миқдори “Ҳудудий электр тармоқлари” АЖнинг Энергосавдо корхонаси томонидан электромобилларни қувватлаш стансияларига сотиладиган ҳар бир кВт.соат электр энергияси учун белгиланган нархнинг 300 сўмдан ошган қисми миқдоридан келиб чиқиб ҳисобланади. Бошқача айтганда, электромобиль эгаларига бўлганлар учун субсидия миқдори 2- гуруҳ истеъмолчилари учун белгиланган тарифнинг 70%и ёки 700 сўмни ташкил этади. Мазкур лойиҳа бир неча сабабларга кўра Энергетика вазирлиги учун яна ёқимсиз бўлиши мумкин бўлган саволлар ва эътирозлар уйғотади. Аввало, лойиҳанинг қисқа муддатда ишлаб чиқилгани росмана ҳайрон қолдиради. Электромобиль эгаларига қувватлаш учун 70% субсидия ажратиш бўййича қарор лойиҳасини ишлаб чиқишни 2 ойдан сал кўпроқ вақт кетган холос. Лекин энерготарифлар кескин оширилганидан буён газлашмаган хонадонлар учун электрга 50%лик чегирма бериш масаласи 2 йилдан кўпроқ муҳокама қилинади, лекин амалий ечимга келганда бир қадам ҳам олдинга силжиш бўлгани йўқ. Демак, хоҳиш бўлса, бажарса бўларкан, хоҳиш бўлмаса эса пайсалга солиб, йилларга чўзиш мумкин. Иккинчидан, “ҳисоб-китоблар ва техник аудит якунига кўра, умумий хулоса шакллантирилади ва шундан сўнг таклифларнинг амалиётга татбиқ этилиши таъминланади”, — дейилганди охирги марта бу масала кўтарилган 2025 йил декабрь ойида. Яъни газлашмаган хонадонларга чегирма бериш борасида ҳисоб-китоб йилларга чўзилмоқда (ваҳоланки, тўғри иш тутилса, газлашмаган хонадонларга чегирма беришга қўшимча бир сўм ҳам сарф бўлмайди, лекин кимлардир охурдан узилади). Электромобиль эгаларига субсидия беришга келганда эса аллақачон ҳисоб-китоб ҳам қилиб бўлинган. Бунинг учун 2026 йилда бюджетдан 246 млрд.сўм харажат қилинади, кейинги йилларда бюджетдан ажратиладиган харажат 819 млрд.сўмгача етади. Учинчидан, қарор лойиҳаси аллақачон вазирлик ва идоралар билан келишиб бўлинипти. Газлашмаган хонадонларга электрга чегирма бериш бўйича эса келишиш 2 йилдан бери якун топмайди (ҳатто суюнчи пулини кесганлар нафақат қарши бўлишган, бюджетдан кафолатланган пул топиб беришганини қаранг). Мана шунақа приоритетлар.