​Электромобиллар импорти ортмоқда Апрель ойида 78,5 млн.долларлик 6 717 дона электромобиль импорт қилинган (март ойида 6 663 дона). Импорт қилинган электромобилларнинг ўртача нархи яна қимматлаган ва 11 693 долларни ташкил этган (мартда 10 822 доллар эди). Апрелда яна гибридлар импорти ҳам ортганини қайд этиш керак. Ой давомида 973 дона гибрид импорт қилинган, бу ўтган йилнинг шу даврига нисбатан 3 карра, мартдагига нисбатан 1,5 карра кўп. Бензинда юрадиган автомобиллар импорти қисқаришдан тўхтаб 1 500-1 600 дона атрофида барқарорлашган ва энди қайта ўсишни кузатмасак керак (божлар яна пасаймаса). Айни пайтда, электромобиллардан фойдаланишни рағбатлантиришнинг бюджет харажатини оширмайдиган ёки адолатли тизими ҳақида яна тўхталишга тўғри келади. Ўзбек жамияти мисқоллаб йиғилаётган бюджетдан электромобиль эгаларига электр қувватлаш учун субсидия ажратиш ёки неча йиллардан бери савол туғдираётган утилизация йиғимидан воз кечиш (ҳеч қурса утилизация инфратузилмаси пайдо бўлгунча) альтернативаси ўртасида афзалини танлаши керак.