Ҳам нархлар ошади, ҳам субсидиялаш кенгаядими? Янгича услубият бўйича тушунтирилишича, электр энергияси ҳамда табиий газни ишлаб чиқариш, етказиб бериш ва тақсимлаш харажатларининг якуний истеъмолчилар учун белгиланган тарифдан ошган қисми Давлат бюджетидан маблағ ажратиш орқали қопланади. Яъни, самарасиз энергетика учун устинадам (тарифлар орқали), остиданам (солиқлар орқали) тўлов ундириш тўхтамайди. Чунки таркибига капитал қиймати ҳам киритилган услубиёт формуласига кўра, активларни тартибга солиш базаси кенгайиб бораверади. Таннарх шишаверади, унинг ортидан тариф ва субсидия қуваверади. "Хавотир шундаки, бизнинг қилган ислоҳотимиз (биринчи босқичда тарифларни ошириш) битта қадам бўлиб, 2−3 йилдан кейин яна ўзининг [таъсирини] йўқотади. Нимага десангиз, ҳозир биз [нархларни] таннархга гўёки олиб келяпмиз, лекин 2−3 йилда ҳозирги, энергияда шаффофлик йўқ тизим билан ким кафолат беради таннархлар яна икки баробар ошиб кетмаслигига?", — дея савол қўйган Дониёр Ғаниев ҳақ бўлиб чиқди. Шундай экан, қора ўпқонга айланган энергетикани субсидиялаш тўхтатилиши тўғрисидаги қуйидаги баёнотларни яна эсдан чиқариб туришга тўғри келади: "Бу субсидияларни бериш қачон тўхтайди, деб савол берадиган бўлсангиз, 2025−2026 йилларда бу давом этади, 2027 йилда кескин пасаяди, насиб бўлса ва 2028 йилдан бошлаб бюджетидан субсидиялар берилмайди".