Инвестицион чекловлар яна юмшаган Ўтаётган ҳафтада капитал ҳаракати билан боғлиқ айрим валюта операцияларини амалга ошириш тартибига навбатдаги ўзгартириш ва қўшимчалар киритилган. Унга кўра, бир календарь йили давомида алоҳида рухсатномасиз хорижда инвестицион фаолиятни амалга ошириш учун киритиладиган маблағнинг юқори чегаралари оширилган. 2026 йил 2 сентябрдан бошлаб, устав капиталида давлат улуши мавжуд бўлган корхоналар ва уларнинг шуъба ташкилотлари хорижга йилига 100 минг долларгача, давлат улуши мавжуд бўлмаган корхоналар эса 200 минг долларгача инвестиция кирита олади. Шунингдек, давлат улуши мавжуд корхоналар ва уларнинг шўба ташкилотлари ўзларининг хориждаги филиал ва ваколатхоналарининг айланма маблағларини тўлдириш учун йилига 50 минг долларгача маблағ йўналтириши мумкин. Давлат улуши бўлмаган компаниялар учун бу миқдор йилига 100 минг долларни ташкил этади. Айни пайтда бир календар йил давомида жисмоний шахслар томонидан 10 000 АҚШ доллари эквивалентидан юқори бўлмаган суммада чет элда инвестиция фаолиятини амалга ошириш — чет элдаги корхоналарнинг устав капиталини шакллантириш ёки улушли иштирок этиш мумкин бўлади (тегишли лицензияга эга бўлган инвестиция воситачилари иштирокида). Йил бошида АҚШ корхоналарига инвестиция қилишга чекловлар олиб ташланганди.