Аниқланган ёпиқ қарорларнинг қанчаси очиқланди? Антикоррупция агентлиги тақдимномаси фақат статистика (галочка ва палочка) ролини бажараётганини белгиси шуки, ўтган ярим йилда аниқланган қарийб 25 минг ҳоким қарорларининг қанчаси очтирилгани тўғрисида бирон маълумот йўқ. Ўтган 6 ойдаги ёпиқ ҳужжатлар майли, ҳали тақдимнома хўжасига етиб бормаган, дея баҳона қилиш, мумкин. Аввалги йиллардаги аниқланган ёпиқ қарорларчи? Ўнминглаб қарорлар ҳалиям қип-қизил бўлиб турганига нима деймиз? Ижро тизимида ёпиқ қарордан фақат иккита томон манфаатдор. Бири ёпиқ қарор орқали истеъмолчиларни, бюджетни, давлатни таламоқчи бўлган олчоқ корчалон, ўғри олигарх, тўймас монополист. Иккинчи тараф эса, шу ёпиқ қарорни имзолаш орқали шерикка айланаётган мазахўрак коррупционер. Шундай экан, ижро тизимида яширин қарор ва коррупция ўртасига бемалол тенглик белгисини қўйиш мумкин.