Яширин қарорларга нисбатан "жазо" тақдимнома холосми? Сўконғич ва уронғич ҳокимларга қарши жазо ўлароқ "ҳайфсан" бериш анъанаси пайдо бўлгани каби, яширин ва ёпиқ қарорларга нисбатан чора ҳам Тақдимнома киритиш билан чегараланадиган кўринади. Антикоррупция агентлигининг Газета"га маълум қилишича, 2026 йил 1-ярмида ҳокимликлар қабул қилинган 24,2 мингта ҳужжатни — умумий сонининг 28,5%ини яширган ёки ёпиб қўйган. Яширилган қарорларнинг 692таси 1,5 трлн.сўмлик маблағларни молиялаштириш билан боғлиқ бўлган. Йил бошида Давлат раҳбари имзолаган фармонга кўра, Антикоррупция агентлиги олдига амалдаги норматив-ҳуқуқий ҳужжатларни коррупцияга қарши экспертизадан ўтказиш ва улардаги коррупциявий хавф-хатарларни бартараф қилиш борасидаги фаолиятни мувофиқлаштириш вазифаси қўйилганди. Коррупция, олигархия ва монополияларнинг томир илдизи бўлган ёпиқ қарорларга қарши курашиш шундай воситалардан бир ҳисобланади. Лекин қандай жазо билан? Фармонга кўра, ҳукумат ва ҳокимликлар қарорларни эълон қилмаслик қонунчиликни бузиш деб ҳисобланади ҳамда тегишли жавобгарликка тортишга асос бўлади. Амалда нима бўлаяпти? Амалда Антикоррупция агентлиги фақат Тақдимномалар киритиш билан чекланмоқда холос. Ҳокимтўраларнинг ўтган ярим йилда яширган минглаб қарорлари бўйича ҳам шундай бўлган ва афсуски, тақдимнома киритиш жазо эмас, рағбатга айланиб бўлган. Ҳукуматнинг ёпиқ қарорлари бўйича-ку агентликнинг бирон бир амалий ҳаракатини умуман кўрганимиз йўқ. Балки Антикоррупция агентлигига ёпиқ қарорлар учун жазолаш билан боғлиқ ваколатлар бериш керакдир? Ёки бўлмасам, агентликда ёпиқ қарорларни бекор қилиш ҳуқуқи бўлиши лозимдир? Ёпиқми, демак ноқонуний деган тамойилга ўтиш пайти келмадимикан? Дарвоқе, Агентлик нафақат вазирликлар, мустақил бўлган турли вазирлик ва регуляторларнинг тобора урф бўлаётган ХДФУ тамғали хатлари, протоколлари, кўрсатмалари ва фармойишларига нисбатан қандай фикрда?