Тартибга солинадиган компанияларнинг тарифлари қанчага ошди? Ҳукумат комиссиясининг электр энергиясини ишлаб чиқариш, узатиш, тақсимлаш ва таъминот, шунингдек, табиий газни транспортировка қилиш ҳамда газ таъминоти хизматлари бўйича тартибга солинадиган тарифларининг аввалги таҳрирлари эълон қилинмагани учун истеъмолчиларда савол туғилиши табиий. Энергокомпаниялар учун тарифлар ўзи қандай ўзгарди? Ёзилишича, тартибга солинадиган тарифлар электр энергиясини ишлаб чиқариш бўйича 8%га, электр энергиясини узатиш бўйича 18%га, электр энергиясини тақсимлаш бўйича 4%га, табиий газни тақсимлаш бўйича 28%га ошган. Май ойида анонс қилинган янги услубиятга асосан, электр энергиясини ишлаб чиқариш нархи 9 фоиз атрофида, етказиб бериш хизмати 30 фоиз ва тақсимлаш хизмати 10 фоиз атрофида ҳамда табиий газни тақсимлаш хизмати нархи 23 фоиз атрофида ошиши прогноз қилинганди. Қайд этилишича, тартибга солинадиган Тарифлар 2027 йилнинг биринчи ярим йиллигида қайта кўриб чиқилиши режалаштирилган.