Серсоя йўлларни танлаш мумкин Қизиқарли янгилик: Ўзбекистонда Yandex Maps дунёда биринчи бўлиб «Яшил йўналиш»ни йўлга қўйди. Энди жазирама иссиқда навигатор пиёдалар учун дарахти кўп, серсоя йўлларни чизиб беради. Бундай йўл одатдагидан бироз узунроқ бўлиши мумкин, лекин бу атайлаб қилинган. Сервис бир неча дақиқани қурбон қилиб бўлса ҳам, одамларнинг салқинроқ юришини ўйлаган. Бунда йўлнинг қуёшли жойлари, дарахтларнинг қалинлиги, ҳаво ҳарорати ва соя жойларнинг қай даражада текис алмашиниши ҳисобга олинади. Бу ерда битта муҳим жиҳат бор: биз кўпинча шаҳардаги дарахтларга шунчаки чирой учун экилган деб қараймиз. Аслида эса бу шаҳардаги яшаш шароитининг қанчалик яхшилигини кўрсатади. Агар одам қирқ даража иссиқда қуёш тиғида юрмаслик учун йўлини узайтиришга рози бўлса, демак, соя — биз учун катта қулайлик. Илгари оддий хариталарга киритиб бўлмайдиган мана шундай кундалик майда деталларни технологиялар ҳисобга ола бошлагани жуда яхши иш бўлган. Бу функция биринчи бўлиб айнан Ўзбекистонда чиққани бежиз эмас. Иқлимимизни ҳисобга олсак, бу шунчаки чиройли қўшимча эмас, балки кундалик ҳаётимизда жуда асқотадиган фойдали нарса. Бу ҳали бошланиши бўлса керак.