Янги автобуслар ҳақида Учинчи ҳафтадирки янги келтирилган автобуслардан фойдаланмоқдаман. Вақтим мўл бўлса, мабодо эски Мерседес автобуси келиб қолсаям, кейинги автобус янги бўлса, хотиржам кутишдан эринмаяпман. Плюслар: Частоталар анча қисқарган, кеч соат 9даям хавотирсиз автобус келишини кутса бўлади. Янги автобусларда кондиционерини ишлатишаетганига жудаям хурсандман. Ишқилиб ўчириб қўйишмаса бўлди. Одамлар илгари бекатлардан йўловчи такси тўхтатиш ё дўкондан у-бу нарса олиш учун фойдаланган бўлса, энди бекатларнинг автобус кутиш функцияси қайтди. Минуслар: Автобусларнинг пробкаларда автомобиллар билан бир қаторда туриши янада кўпайди, алоҳида йўлак иккита кўчани айтмаса ишламаяпти. Бекатлар ва уларга яқин ҳудудлар парковка бўлиб кетгани учун, автобуслар иккинчи, ҳатто учинчи йўлакда тўхташга мажбур бўлишмоқда. Йўл ҳақи картадан тўланганини ҳар сафар кондукторга айтишга ва тушунтиришга тўғри келади. Йўловчининг тўлови картадан ўтганини тасдиқловчи бирон ишора тизими керак. Янги автобуслар йўлга қўйилгач, негадир Google Maps'нинг борар манзил танланганда энг қулай автобус ва метро йўналишларни тавсия этадиган функцияси ишламай қолди. Бу биз тарафдан бўлганми ё йўқ, тушуниш қийин. Автобуслар, метро, оптимал маршрутлар, келиш, кетиш вақтлари ва умуман жамоат транспортларидан фойдаланишни осонлаштирадиган ва рағбатлантирадиган Ягона илова йўқлигида бу жуда ёмон. Ўзингники йўқ экан, борини ишлатишга қўйиб беринглар, барака топгурлар. P.S. Айтишларича, автобуслар ён ойналарини қорайтиришга 40 бҳм миқдорида тўлов бор экан. Мана буниси энди абсурд. Кондиционери ишлаётган автобус янада кўпроқ ёқилғи сарфлаши учун шундай қилинганми?