Жафокаш Тошкент туманида 210 минг эмас, 340 минг аҳоли яшаши маълум бўлган Давлат раҳбари ҳузурида аҳоли ва қишлоқ хўжалигини рўйхатга олиш якунлари тақдимотида қатор ҳайратли рақамлар келтирилган. Қайд этилишича, рўйхатга олиш натижаларидан кейин Тошкент вилоятининг Тошкент тумани аҳолиси аввалги ҳисобга нисбатан 1,6 баробар кўп экани маълум бўлган. Расмий рақамларга кўра, Тошкент туманида 2026 йил бошида 209,8 минг, 1 июль ҳолатига эса 214 минг аҳоли яшайди. Рўйхатга олиш якунлари туманда бу рақамлардан 1,6 карра кўп — камида 340 минг аҳоли яшашини кўрсатган. Фарқни тасаввур этаяпсизми? Ўзи аҳолиси ўта юқори ўсаётган (хусусан, пойтахт Тошкентдан кўчиб ўтишлар ҳисобига) Тошкент туманида аҳолининг ўсиш суръати Республикада энг юқори даражада (йиллик 3,5%дан юқори). Нима учун Тошкент тумани доимий равишда энергетика (электр ва газ), инфратузилма (мактаб, поликлиника, сув, йўл, транспорт) муаммолари ичида яшашини тушунгандирсиз? Катта эҳтимол, Республикадаги масъуллар тумандаги аҳоли кўламини токи рўйхатга олиш натижалари чиқмагунча тасаввур этишмаган ва эскича ҳисоблар билан қарорлар қабул қилиб келинаверган. Тошкент туманидаги картинанинг тескариси бўлган вазият Андижон шаҳрида қайд этилган. Демак, Андижон шаҳрида, расмий рақамларда айтилганидек, 2026 йил бошида 503,5 минг эмас, 15,8% кам, 428 минг аҳоли яшаши маълум бўлган (худди Рашидов даврида марказдан ресурслар ундириш учун Ўзбекистон, айниқса Тошкент шаҳрининг аҳолиси кўпайтириб кўрсатишга уринилгани эсга тушади). Мана нима учун рўйхатга олиш керак ва зарур? Энди тушунгандирсиз?