Бизга шуни бозор деб кўрсатишмоқчими? Пропан спекуляцияси давом этади Агар аҳолига пропан етказилиши янги монополист LPG-Trade қўлига ўтказилса-ю, LPG-Trade аҳолига пропан сотиб олиш учун биржага чиқишни бошласа, шу кунларда бўлаётган спекуляциялар давом этаверса, бозорга ўтиш эмас, навбатдаги "бўтқа ислоҳот" бўлади. Ўтган жума, 4 сентябрдаги савдоларда биржада пропан таклифи 336 тоннадан бирданига 1 786 тоннагача ошган. Натижада нарх 16,5%га 6 225,3 минг сўмгача тушган. Нечук, шунча кундан бери таклифни сунъий равишда қисиб келаётган монополист ишлаб чиқарувчилар ва импорт олигархлари бунақа ҳотамтойлик қилворган деб ўйлашингиз мумкин. Эҳтимолки, бу бир марталик томоша "пропан ислоҳоти" бўйича катта йиғилиш олдидан чиройли рақамлар учун керак бўлган чиқар (аҳолига пропанни шу нархдан олсак, бу нарх чиқади қабилида). Кейинги савдолардаёқ, 7 сентябрь якунлари бўйича таклиф яна 605 тоннага тушиб қолгани ва нарх яна 21,5%га, 7 566,5 минг сўмгача сакраганини кўрган бўлсангиз, гумонларингиз иймонингиз билан ўзингизда қолади. Бизга, ислоҳот дея агар янги ясалган монополистни спекуляцион биржадан пропан олиб аҳолига сотишни кўрсатишса ва буни бозор деб аташса, навбатдаги ёлғон бўлади. Худди 2024 йилдаги, худди 2025 йилдаги каби. Шунақа тасаввур туғилмоқдаки, 9 йил давомида ўзбекистонликларни талаган шонли энергетикларнинг валийнеъматлари ва устозлари яна довга қайтишган ва қаерлардадир ўтириб, маслаҳатгўйлик қилишмоқда.