Пропан биржада 60%дан кўпга қимматлаган: энди 1 долларлик пропанни кўрамизми? Кечаги биржа савдоларида пропаннинг нархи бирданига 60,6%га ёки қарийб 4,5 млн.сўмга ошиб, 11,9 млн.сўмлик чегарадан ҳам ўтган. Бу нархда биржадан олинган пропан чакана савдоларда, агар ҳозирги нархлар, солиқлар ва маржа, коррупцион харажатлар (ҳа, ҳа, коррупцион харажатлар ҳам бор) инобатга олинса, камида литрини 12 минг сўмдан сотилиши керак бўлади. Бу ўтган ҳафта прогноз қилганимиздек, 1 доллардан кўп дегани. Қизиқ тарафи, биржадаги пропан нархи 16 сентябрдаги савдоларда худди Госплан қарори билан фиксирлангандек, ўзгаришсиз қолганди (9,10,11 сентябрда ҳам шундай бўлган, 15 сентябрь кунги натижалар эълон қилинмаган). Сотилган ҳажм ҳам охирги кунларда деярли ўзгаришсиз қолган. Энг асосий ёқилғи турларидан бўлган пропаннинг 60%дан кўпга қимматлагани, унинг сабаблари ва оқибатлари бўйича биронта масъул давлат органи расмий изоҳ ёки тушунтириш бергани йўқ. Бу аҳолига етказиладиган пропан нархи ўзгаришлари билан боғлиқми? Ё бошқа сабаблар борми (потолок спред бекор қилиниши, алоҳида майдончага ўтказилгани, Ўзбекнефтегаз ва Лукойл савдога пропан қўйишни тўхтатгани)?