Кун тартибида ўтган ёмон замондан шу омон кунларга қайтиш ҳақида Бугун Ахборотдан эркин умумфойдаланишга бағишланган Халқаро онлайн-конференцияда Ўзбекистон томонидан янграган фикрларга турлича баҳо берилди. Кимдир олқишлади, кимдир танқид қилди. Лекин Ўзбекистон томонидан асосий нотиқнинг олдинги даврга нисбатан ишлатган аллегорияларига дунёқараши ва олдинги даврга муносабатидан қатъий назар, жуда кўпчилик норозилик билан муносабатда бўлди. Албатта, бу нотиқнинг шахсий қараши ва ёндашуви, ўша замонда яшаган, ишлаган, кўрган, ўхшатиш ва менгзашларга тўла ҳақли. Лекин жамоатчиликнинг муносабатини кўриб, барча муаммоларда ўтган тузумни қоралаш усули ўзининг умрини ўтаб бораётганини, бундан буёғига бундай методичка иш бермаслигини сезаётгандекман. Ўтган ҳафта Карнеги маркази янги режимнинг имижи ҳақида катта мақола эълон қилди. Мақола амалдаги режимга ўта лоял ёзилганига қарамай қатор цензуралар билан маҳаллий матбуотда ҳам чоп этилди. Йўқ, ҳозир гап цензурада эмас. Гап шундаки, мақолада жуда катта ҳақиқат баён қилиб қўйилган. Янги даврда ўтган даврда пайдо бўлган жуда кўп катта муаммолар бартараф этилди: Чегаралар ёпиқлиги, конвертация, нақд пул, прописка, четга чиқиш ва ҳаракатланиш, вҳк, яна санаш мумкин. Энг асосийси оммавий қўрқув барҳам топди. Булар учун катта раҳмат, ҳеч ким буни унутгани йўқ, унутмайди ҳам. Лекин орадан тўрт йил ўтиб, халқни ва мамлакатни қийнаётган асосий муаммолар айнан янги даврда пайдо бўлди. Ҳокимлар зўравонлиги, қонунлар ишламаслиги, ҳуқуқдаги истиснолар, иқтисодий сиёсатга айланаётган протекционизм, мамлакатни талаш ва сотишга тайёр ички ва ташқи олигархия, еб тўймас монополиялар, тизимга айланаётган коррупция, давлатнинг иқтисодиётга ҳаддан зиёд аралашуви, мулк ҳуқуқининг фикцияга айлангани, авж олаётган кўзбўямачилик, юқумли ёлғончилик - буларнинг кўпчилиги айнан янги даврда катта муаммога айланди. Бу муаммолар ўтган даврга тош отган, аввалги қарор қилганларни айбдор қилган билан ечилиб қолмайди. Муаммолар бу жараёндир, деганимиз билан ҳам сўрилиб кетмайди. Демак, ўзимиз яратган бугунги кун муаммоларига аста-секин бўлсада қайтишни, уларни тан олишни бошламоғимиз зарур. @the_bakiroo