Менинг бир гипотезам бор Муҳримнинг некбинлиги ва умидсизлигини тўғри тушунаман. Шаҳарда жамоат транспорти, жамоат макони, экология, мактаб ва умуман ижтимоий неъматлар сифати яхшиланишига бирон туртки ё омил горизонтда кўринмайди. Менинг бир гипотезам бор. Бу гипотезага кўра ўзбек чиновниклари, улар ё каттами ё кичикми, токи муаммо уларга фойда келтиришда давом этар экан ёки уларнинг ўзига зиён етказишни бошламагунича муаммони ечиш ҳақида ўйлаб ҳам кўрмайдилар. Эслайсизсизми, конвертация муаммоси қандай ечилган эди? Чекланган конвертация йиллар давомида ўзбек чиновникларининг озиқлантирадиган ва бойитадиган манбалардан бўлиб келган. Токи чекланган конвертация уларнинг шишиб, кенгайиб бораётган бизнесларининг ўзига зиён келтиришни бошламагунича. Шунда улар англаб етишди: Энди конвертация чекловлари уларнинг ўзига ҳам зиён. Эслайсизми, ўзбекларнинг крепостнойликка маҳкум этган прописка чекловлари? Бу чекловлар йиллар давомида ўзбек чиновникларини бойитиб, қудратли қилиб келган. Ваколатига ваколат қўшган. Даври келдики, энди прописка чекловлари билан пул қилиб бўлмайди, агар чекловлар сақланса, уларнинг коррупцион даромfдлари ҳисобига потиратиб қурилаётган уйлари, офислари, мажмуаларга бошқа харидор чиқмайди, зарарга ишлай бошлашади. Қарангки, зарарига ишлай бошлаганда ўзбек чиновникларининг калласи ишлаб кетади. Худди шундай, мажбурий меҳнат (пахтага ва қишлоқ хўжалиги ишларига мажбурлаш), ОВИР (четга чиқиш) чекловлари ҳам токи улар чиновникларнинг имиджи ва чўнтагига зиёнли бўла бошлагани англаб етилгачгина бекор бўлгани ҳақида фикр юритиш мумкин. Шу маънода пойтахтда ва йирик шаҳарларда жамоат транспорти, жамоат макони, экология, мактаб ва умуман ижтимоий неъматлар сифати билан боғлиқ муаммолар ечим топишига мен ҳам унча ишонмайман. Чунки бу муаммолар ўзбек чиновникларига ҳали-бери зиён келтираётгани йўқ. Чунки улар маҳаллий аҳоли билан ижтимоийлашмаган: Улар автобусда ё пиёда юрмайди. Уларнинг болалари халқнинг мактаби ё поликлиникасига бормайди. Уларга экология ва яшиллик керак эмас, уларнинг Чорвоқда, Мальта ё Латвияда баҳаво жойлари етарли. Ва энг асосийси, улар ва уларнинг болалари ўзларининг келажагини Ўзбекистонда кўрмайди. @the_bakiroo