Дарвоқе, бу зараркунанда лойиҳани ўқиганлар автомашина эгалари маҳаллий бюджет учун йиллик йиғим билан бирга яна битта йиғим жорий қилинаётганига гувоҳ бўлишади. Бензин, дизель ёқилғиси, суюлтирилган ва сиқилган газни охирги истеъмолчиларга реализация қилишда ёқилғи бирлиги учун солиқ ўзи илгаритдан бор эдику, деб таажубга тушмоқдамисиз? Тўппа-тўғри, худди шундай номдаги солиқ илгари бўлган ва ҳозир уни акциз солиғи номи билан тўлаймиз. Шўрпешонамизга битган тепадагилар халқнинг хотираси калта, исталган пайтда хоҳлаганча алдаш мумкин, деб ўйлашади. Бензин, дизель ёқилғиси ва газ ишлатганлик учун олинадиган солиқ 2019 йил 1 январгача мавжуд бўлган. Кейин бу солиқни 2019 йил 1 январдан Акциз солиғига алмаштиришган. 2 йил ўтди, энди яна шу солиқни йиғим номи билан ва маҳаллий кенгашлар қўли билан тикласак бўлади, деган фикрга келишган кўринади. Агар лойиҳа маъқулланса, айни бир мазмундаги йиғим(солиқ)ни икки марта ундиришаётган бўлади. Бунга эса асло йўл қўйиб бўлмайди. Ҳозироқ ҳаволага киринг ва эътирозларингизни баён қилинг. Бунга ҳақлисиз!