​Декларацияланмаётганликлардандирда Кичкинагина Божхона постининг раҳбари «Tashkent City» мажмуасидан 2 та хонадон ва битта нотурар жой сотиб олган ва бу рўйхат анчагина узунроқ. Гап ҳозир «Tashkent City» объектлари янги даврда пора ва коррупцион даромадларни легаллаштирадиган ва ювадиган воситалардан бирига айланиб қолганида эмас. Ситидаги ҳар бир олинган квартира ва дўконларнинг сотиб олиш манбалари текширилса, аминманки, юзлаб, минглаб амалдорларнинг ноқонуний даромадлари изларини топиш мумкин бўлади. Божхона пости раҳбари "асосий айби унинг ўғирлигида эмас, кимгадир ёқмай ё бўлишмай ушланиб қолганида ва чиқим материали сифатида қурбон берилганида". Албатта қурбонликни ундан каттароқлар амалга оширган. Атрофингизга бир қаранг, айрим давлат амалдорлари, ҳокимлар, уларнинг фарзандлари, қариндошлари қандай ҳаёт тарзини кечирмоқда. Уларнинг ҳаёт тарзи бир кунлик харажати бир ойлик расмий даромадидан ҳам кўп. Қўша-қўша хонадонлар, қават-қават уй-жойлар, чет элдаги активлар, қиммат ва намойишкорона ҳаёт - булар бир қатор ўзбек амалдорларининг нормага айланган атрибутидек бўлиб қолган. Шу маънода давлат амалдорлари (қариндош уруғлари) даромадлари, харажатлари ва мол-мулкларини декларациялаш масаласи тинимсиз пайсалга солиб келинаётгани сабаби тайин. Декларациялаш уларнинг қип-қизил ўғри ва муттаҳамлигини аён қилиб қўяди, ўғирланган маблағларни ўзлаштириш ва ишлатишни эса жудаям қийинлаштиради. Бу эса ҳозирча керак эмас.