AKFA University ва 25 гектар ер Хушнудбекнинг ёзишича, Қибрайда 25 гектар майдонга қурилиши режалаштирилаётган иккинчи университет - AKFA University экан. Университет маъмурияти бу маълумотни тасдиқлади. Уларнинг айтишича, мазкур ҳудудни бошқа бир тадбиркорлик субъектидан харид қилишган, деб ёзмоқда Хушнудбек Худойбердиев. Шу ўринда қатор саволлар туғилади: Биринчидан, 25 гектар ер майдонига эга ва уни университетга сотмоқчи бўлган тадбиркор ким эканлиги қизиқ. Бу ер майдони тадбиркорга қачон ва қай шартларда ажратилган? Иккинчидан, қонунчиликка кўра, агар ер майдони қишлоқ хўжалиги фойдаланувида бўлса, уни сотиш мумкин эмас. Ер майдони қишлоқ хўжалиги фойдаланувидан ташқарида бўлса, ер эмас, ерда жойлашган бино иншоотлар сотилади, бир субъектдан иккинчисига бино ва иншоотлар жойлашган ердан фойдаланиш ҳуқуқи ўтади. Учинчидан, кейинги пайтларда амалдорлар ё улар билан аффилланган корхоналарга эмас, асл битимни ниқоблаш учун ташкил этилган прокси корхоналарга ер майдони ажратиш урфга кирмоқда. Кейинроқ ўша прокси компаниядан амалдорлар ё улар билан аффилланган корхоналар гўёки қурилиш бошланган ер майдонига бўлган ҳуқуқни ўзига ўтказиб олиш жараёнини амалга оширишмоқда. Нима бўлгандаям, AKFA University эгалик қилмоқчи бўлган 25 гектарлик ер майдони қай ва қандай тарзда қўлга киритилгани алоҳида суриштирувга муҳтож. Маълумот учун: 2020 йил июнь ойида AKFA Universityга Тошкент вилояти, Қибрай тумани, Унқўрғон ҚФЙ, Парвоз МФЙ ҳудудида жойлашган, Тошкент шаҳар ҳокимлигига қарашли “Манзарали боғдорчилик ва гулчилик” МЧЖ балансида бўлган 29,48 га ер майдонини ажратиб бериш бўйича Ҳукумат қарори лойиҳаси пайдо бўлганди. Ўшанда бу қарор жамоатчиликнинг кескин норозилигига сабаб бўлган ва лойиҳа қабул қилинмаган эди. @the_bankiroff