​Чиққан жойига қараб кетаётган Россия Бугун Қрим босиб олинганига етти йил, Борис Немцов отиб ўлдирилганига олти йил бўлди. Таъбир жоиз бўлса, Немцовнинг Кремлдан 200 метр нарида ўлдирилиши Путин учун Қримнинг босиб олинишининг бир йиллигига рамзий совға бўлган. Орадан олти йил ўтганига қарамай, бу сиёсий қотилликнинг буюртмачиси топилгани йўқ, топилмайди ҳам, токи қотил Кремлда ўтиришда давом этар экан. Ҳар йили Немцовнинг хотираси учун шу кунда бутун Россия бўйлаб намойишлар ўтказиларди. Бу йил Кремль бирон бир тадбирга рухсат бергани йўқ. Навальний қамоқда ўтирипти. Бундан буён фақат гайкалар қотирилиши учун янги ва янги муждалар берилмоқда. ФСБ жойлашган Лубянка майдонига бўғзигача қонга ботган баттол Дзержинскийнинг ҳайкалини қайтадан тиклашмоқчи. Айнан 1991 йил 22 августда Дзержинскийнинг ҳайкали қулаши билан рамзий маънода зўровонликлардан воз кечган янги Россиянинг йўли бошланганди. Қарангки, яна Дзержинскийнинг ҳайкали тикланиши билан эски, исқирт, зўравон Россия бошқатдан қад кўтармоқда. Ўттиз йил деганда Россия қаердан чиққан бўлган бўлса, ўша чиққан жойига яна қайтиб келди. Лекин умидлар ўлмаган, орзулар сўнмаган, ҳеч қурса битта эркин рус фуқароси қолган экан, Россия албатта озод бўлишига ишонч сақланаверади. @the_bankiroff