Биронта жиддий саволга жавоб бермай, матбуот анжумани ўтказиш мумкинми? Мумкин! Ўтган ҳафта Наврўз қабуллар уйини бузиб бўлиб, икки кун ўтгач авариявий эди, деб хаспўшлашгани эсингизда бўлса керак. Қурилиш вазири матбуот анжумани ўтказиб, бошқа саволларни қандай айланиб ўтиб кетган бўлса, Наврўзнинг бузилиши масаласида ҳам шу "приём"ни қўллаган. Биринчидан, Наврўзнинг авариявий экани ҳақида нега уни бузишдан аввал очиқ айтилмади? Иккинчидан, агар ҳақиқатан ҳам Наврўз авариявий ҳолатга тушган бўлса, унинг пойдевори силжиганини (энди чўккани дейишмоқда) акс эттирадиган техник-муҳандислик ҳисоблар, фото ва видео материаллар, давлат комиссияси хулосаси қани? Нега эълон қилинмаяпти? Учинчидан, Таъмирлаш ишларини қайси компания бажарди? Қанча маблағ сарфланди бунга? Дарвоқе, вазирнинг "Бизнинг тартиб бўйича бинони таъмирлашдан олдин техник кўрик ўтказилади. Буларнинг битта айби – техник кўрикни бино таъмири билан параллел равишда бошлагани" сўзларидан кейин тўртинчи савол пайдо бўлмоқда: Бу тартибни бузганлар қандай жазо олди, оладими ўзи? Нима учун, қайси пудратчининг манфаатлари учун техник кўрик тартиби бузилди?