Хурсанд бўлишга шошмаган бўлардим Тармоқда ёзишларича, Жисмоний шахслар хусусий тадбиркорлик патенти очиб, таксичилик қилиши мумкин. Бу ҳақда Президент қарори имзоланган. Унга кўра, 2022 йил 31 декабргача муддатга эксперимент тариқасида якка тартибдаги тадбиркорларга 4 та ўриндиқли енгил автотранспортда йўловчи ташиш фаолияти билан шуғулланиш ҳуқуқи берилмоқда. Бунинг учун аввал бошда 690 минг сўм, ойига эса 425 минг сўмдан тўлов амалга оширишларига тўғри келади. Ҳали ҳужжатнинг тўлиқ ва расмий матни пайдо бўлгани йўқ. Лекин маълум бўлган тафсилотлар бўйича айрим фикрларни билдириш мумкин. Биринчидан, 1 йил аввал таксистларни даромад солиғидан озод қилиш ва ўзини ўзи банд қилувчилар қаторига қўшиш ваъда қилинганди. Бугунги ҳужжатда бу ҳақда ҳатто эслаб ҳам ўтилмаган. Демак таксичиларни солиқдан озод қилиш ва уларни ўзини ўзи банд қилувчилар деб топиш бўйича вазифаларни эсдан чиқарсак бўлади. Иккинчидан, янги тартиб ҳам вақтинчалик, ҳам эксперимент тарзида экани айтилмоқда. Демак исталган вақт ўзгариб қолиши ҳеч гап эмас. Тажрибамиздан келиб чиқилса, ўзгаришлар фақат аҳоли ва бизнес зиёнига юз бериши мумкин. Учинчидан, 2021 йил 1 сентябрдан бошлаб якка тартибдаги тадбиркор сифатида такси фаолияти билан шуғулланиш фақатгина мижозларни излаш бўйича интерактив хизмат кўрсатувчи компаниялар (агрегаторлар) хизмати орқали амалга оширилиши белгиланган. Агрегаторлар эса йирик шаҳарлардан бошқа ҳудудларга кириб бормаган. Демак, тартиб таксистларнинг жуда катта қисмини қамраб ололмайди, ҳайдовчилик билан оила тебратаётганларнинг аксари яна қонундан ташқарида қолаверади. Тўртинчидан, легаллашиш учун белгиланган тўлов - аввал бошда 690 минг сўм, ойига эса 425 минг сўм харажатлар билан фақат Тошкент шаҳрида фаолият кўрсатиш мумкин. Туманларда ва ҳатто айрим вилоят марказларида ҳам бу сумма даромад олиб фаолият кўрсатиш учун бўлажак таксистларга жуда қимматлик қилади. Нега шкала асосида тўловлар белгиланмади, ҳайронман. Ахир Шуманай туманидаги таксист билан Яккасарой туманида таксист даромад ва харажатлари бир хил эмаску. Хуллас, савол кўп. Бу ҳужжат эълон қилинган шартлар доирасида таксичиларни нолегалликдан чиқариши қийин. Жудаям қийин.