Ниҳоят! Таксистларнинг оҳлари кўкларга етди! 2022 йил 1 сентябрда бошлаб таксичилик, яъни йўловчиларни енгил автотранспорт воситаларида ташиш фаолияти ўзини ўзи банд қилган шахслар шуғулланиши мумкин бўлган фаолият турлари рўйхатига киритилмоқда. Бу тартиб 2024 йилнинг охирига қадар амал қилади. Кейин яна худо пошшо! Бу ҳали ҳаммаси эмас. Маълум қилинишича, энди автомобилларни бошқариш учун ишончномаларни фақат нотариусда эмас, электрон шаклда ҳам расмийлаштириш мумкин бўлади. Электрон ишончнома расмийлаштирилганда давлат божи унинг амал қилиш муддатидан келиб чиққан ҳолда - 1 ойгача бўлган муддатга 90 минг сўм, 6 ойгача бўлган муддатга 450 минг сўм, 3 йилгача бўлган муддатга 900 минг сўм миқдорида ундирилади. Қўшимчасига Юридик шахслар ҳайдовчиларининг икки йилда бир марта мажбурий малакасини ошириш талаби ва фуқаро томонидан ўзининг автомобилини йўловчи ташиш лицензиясига эга бўлган юридик шахсларга ижарага берилганда нотариал идоралар томонидан тасдиқлаш талаби бекор қилинади. Хуллас, автомобиль бошқаруви ва таксичилик маъмурчилиги билан боғлиқ бюрократияга қақшатқич зарба берилмоқда.