Кумтор авантюраси Кумтор - Қирғизистондаги олтин кони. Конда олтин рудаси қазиб олиш ва қайта ишлаш ҳуқуқи Centerra Gold Inc компанияси ва унинг шўъбаси Кумтор Голд Компанига тегишли. Йилига 15-18 тонна олтин қазиб олинади. компаниянинг мамлакат ЯИМидаги улуши 10-12%ни ташкил этади. Ҳукуматнинг махсус комиссияси Кумтор Голд компани Қирғизистонга жами 4,2 млрд.долларлик жарима қўллаш ҳақидаги хулосага келган. Суд ушбу талабларни қаноатлантирган. Ҳаммаси компанияни национализация, яъни тортиб олишга қараб кетмоқда. Ҳокимиятга келган ҳар бир қирғиз раҳбари ишни Кумтор билан тузилган битимларни тафтиш қилишдан ва халқ номидан, аслида ўзи истаётган коррупцион улушни талаб қилишдан бошлайди. Акаев даврида, Бакиев, кейин Атамбаев ҳокимиятга келганида ҳам келишув бир неча марта ўзгартирилган. Ўтган йили давлат тўнтариши йўли билан ҳокимиятга келган Жапаровнинг асосий лозунгларидан бири ҳам айнан Кумторни тортиб олиш билан боғлиқ бўлган. Кўраяпмизки, 6 ой ўтиб ҳаммаси шунга қараб кетмоқда. Албатта, Кумторнинг тортиб олиниши, гарчи лойиҳага оид ўтмишдаги битимларда кўплаб ўзлаштиришлар ва коррупцион элементлар бўлганига қарамай, жуда ёмон сигнал. Centerra Gold Inc халқаро судларда ўз ҳақини, табиийки, ҳимоя қилади. Жапаров эса ўзининг ҳомийларига Кумторни тортиқ этиши, орзулаган моддий манфаатларини рўёбга чиқариши мумкин. Лекин олдиндан ўтиб айтиш мумкинки, бундан Қирғизистон ҳам, унинг иқтисодиёти ҳам фақат ютқазади.