​“Ўзбекнефтгаз”да майда ўғриларга қарши курашилмоқда, жиддийроқ манфаатларга келганда-чи? “Ўзбекнефтгаз” АЖ “Андижон нефть базаси” масъулияти чекланган жамиятида текширувлар ўтказганлиги айтилмоқда. Текширув ва ўрганишлар натижаси ўлароқ, "Андижон нефть базаси” МЧЖ ва унинг филиаллари тасарруфидаги 12 та ФЁТШлар томонидан вилоятдаги қишлоқ хўжалик маҳсулотларини етиштирувчи истеъмолчиларга жами 33 млн.сўмлик (!) камомадлар аниқланган. Ишдаги йўл қўйилган камчиликлар ортидан “Андижон нефть базаси” МЧЖнинг ўрта ва майда менежментига турли кўринишда жазо чоралари қўлланилган. Албатта, бундай ҳаракатлар олқишга сазовор. Лекин "Ўзбекнефтегаз"нинг бизнес манфаатлари ҳар бир занжирда етарлича ҳимоя қилинмоқдами? Бундан бир ой муқаддам компаниянинг пойтахтнинг Байналминал кўчасида жойлашган машҳур АЁҚШси ярим тундан ўраб олиниб, бузиб юборилганди. Шу каби шохобчалар энг чекка вилоятларда ҳам камида 15-20 млрд.сўмга баҳоланади. Тошкентнинг қоқ марказида жойлашган ва кунига миллионлаб даромад келтирадиган, бозор қиймати бир неча миллион долларни ташкил этадиган АЁҚШ ярим тунда бузиб юборилгани бўйича монополистнинг на расмий ва на норасмий муносабати очиқланган. Кеча тунда ўтиб кетаётиб кўрдимки, Байналминал кўчасида жойлашган АЁҚШ ўрнида қандайдир хусусий савдо ва тижорий комплекс қурилмоқда (сурати иловада). Қизиқ, ушбу манзил бўйича олтин нархидаги жой амалда қанчага пулланган экан? Ҳеч қурса "Ўзбекнефтегаз" АЖ бино, ускуна ва омборлари қиймати қопланганмикан? Янаям қизиғи, бу қандай кучки, Ўзбекистоннинг энг йирик 5та солиқ тўловчисининг мол-мулкини ярим тунда буздириб юбориш қудратига эга? Ахир АЁҚШ маъмурий босим билан компания бўйнига илинган нопрофиль актив эмаски, ундан осонгина воз кечиб юборилган бўлса.