Банклар фонд ва валюта биржаларининг 100%лик таъсисчилари бўлиши мумкин Агар таклиф этилаётган Низом Лойиҳаси кучга кирса, тижорат банклари фонд ва валюта биржаларига тўлиқ эгалик қилишлари мумкин бўлади. Лойиҳа билан иккита - кўчмас мулкка ва қимматли қоғозларга қилинган инвестициялар билан боғлиқ таваккалчиликларнинг энг кўп миқдорини белгиловчи ҳужжатлар бирлаштирилмоқда ва "Банклар ва банк фаолияти тўғрисида"ги Қонуннинг 7- моддасига мувофиқлаштирилмоқда. Янгиланган Низомда жиддий ўзгаришлардан бири - бу банкларнинг қимматли қоғозларнинг иккиламчи бозорига жойлаштирилган акцияларнинг йигирма фоизидан ортиқ бўлмаган миқдорда фонд биржаси листингига киритилган акциядорлик жамиятлари улушларига эгалик қилишлари мумкинлиги билан боғлиқ. Яъни, аввало банклар бевосита банк, кредит, молия соҳаси билан бевосита боғлиқ бўлмаган акциядорлик жамиятлари улушларигагина эгалик қила олади, бунда ҳам бирламчи жойлаштиришда эмас, фақат иккиламчи бозор орқали ва бу улуш 20% билан чекланади. Амалдаги Низом бўйича банклар бошқа юридик шахс устав капиталининг 26 фоизидан ортиқ бўлмаган қисмига эгалик қилиши мумкин эди. Ўтган йилларда банкларнинг бўйнига маъмурий босим билан илиб юборилган парррандачилик, қуёнчилик, қорамолчиликдан тортиб агротеххизматларгача бўлган турли корхоналар ва умуман банклар менежментининг чўнтак компанияларига айланган улушлар Низом кучга киргач 3 ой ичида сотилиши керак. Бундай корхоналар ва улушлар айниқса ҳозир трансформация жараёнини бошидан кечираётган давлат банклари активларида ҳаддан зиёд. @the_bakiroo